Hakbesik ba Maromak iha orasaun

1. Orasaun katak ko’alia ho haraik-an ba Maromak. Ita tenke harohan, ou hamulak ba Maromak beibeik. Hanesan ne’e Ita bele sente besik ba nia hanesan belun ida. Jeová boot loos no iha podér maka’as, maibé nia rona ita-nia orasaun! Ita harohan beibeik ba Maromak ka lae? — Salmo [Mazmur] 65:2; 1 Tesalonia 5:17.

2. Orasaun halo parte iha ita-nia adorasaun. Nune’e, ita tenke harohan de’it ba Maromak, Jeová. Kuandu Jesus hela iha rai, nia sempre harohan ba ninia Aman, la’ós ba ema ida seluk. Ita tenke halo hanesan Jesus. (Mateus 4:10; 6:9) Maibé, ita tenke hato’o ita-nia orasaun hotu iha Jesus nia naran. Hanesan ne’e, ita hatudu katak ita iha respeitu ba Jesus nia pozisaun no katak ita iha fé ba ninia sakrifísiu rezgate nian. — Joao 14:6; 1 Joao 2:1, 2.

3. Kuandu ita harohan, ita tenke ko’alia ba Maromak husi ita-nia fuan-laran. Ita labele dekór orasaun ou lee husi livru-orasaun ida. (Mateus 6:7, 8) Ita bele harohan iha pozisaun naran de’it ne’ebé hatudu respeitu, tempu naran de’it, no fatin ne’ebé de’it. Maromak bele rona mós orasaun ne’ebé ita hato’o iha ita-nia laran de’it. (1 Samuel 1:12, 13) Di’ak se ita buka fatin hakmatek ida, dook husi ema, atu halo ita-nia orasaun rasik. — Marcos 1:35.

4. Kona-ba buat saida mak Ita bele harohan? Kona-ba buat hotu ne’ebé bele hametin ou estraga Ita-nia relasaun ho Maromak. (Filipe 4:6, 7) Iha orasaun Ami Aman, ne’ebé Jesus hanorin ita, hatudu katak ita tenke harohan kona-ba Jeová nia naran no buat nia hakarak halo. Ita mós bele husu buat ita presiza loroloron, atu perdua ita-nia sala, no ajuda ita atu tahan tentasaun. (Mateus 6:9-13) Ita-nia orasaun la’ós kona-ba ita-nia an de’it. Ita tenke harohan de’it kona-ba buat sira ne’ebé tuir Maromak nia hakarak. — 1 Joao 5:14.

5. Ita bele halo orasaun bainhira de’it Ita-nia fuan book Ita atu agradese ou hahi’i Maromak. (1 Crônicas [1 Tawarikh] 29:10-13) Ita tenke harohan bainhira Ita iha problema no hetan situasaun ruma ne’ebé bele halo fraku Ita-nia fé. (Salmo [Mazmur] 55:22; 120:1) Tempu di’ak mós atu halo orasaun mak antes Ita atu han. (Mateus 14:19) Jeová konvida ita atu “hamulak nafatin ba”. — Efeso 6:18.

6. Ita tenke harohan liuliu se ita halo sala boot. Iha tempu hanesan ne’e ita tenke husu maka’as ba Jeová atu sente hanoin mai ita no perdua ita. Se ita konfesa ita-nia sala no ita haka’as an atu la halo fali, Maromak prontu atu perdua. — Ebreu [Ibrani] 8:12; Provérbios [Amsal] 28:13.

7. Jeová rona de’it ba orasaun husi ema loos. Atu Maromak rona Ita-nia orasaun sira, Ita tenke haka’as an atu moris tuir Ninia lei sira. (Provérbios [Amsal] 15:29; 28:9; Joao 9:31) Ita tenkesér haraik-an bainhira Ita harohan. (Lucas 18:9-14) Ita tenke haka’as an atu hala’o tuir buat Ita harohan. Nune’e, Ita hatudu katak Ita iha fiar, no mós katak buat Ita halo hanesan ho buat Ita ko’alia. Hanesan ne’e de’it maka Jeová sei hatán Ita-nia orasaun sira. — Ebreu [Ibrani] 11:6.

Copyright © 2010 Watch Tower Bible and Tract Society of Pennsylvania. All rights reserved.