Suku Helie? - Onumbi yo Internet Yolombangi Via Yehova

Onumbi yo Internet Yolombangi Via Yehova

Beliefs

Future

Suku Oyongola Nye Kokuetu?

Ocipama ca 2

Suku Helie?
	Suku yocili helie kuenda onduko yaye helie? (1, 2)
	Etimba lipi Eye akuete? (3)
	Vipi ovituwa viaye viavelapo vali? (4)
	Eci tufendela (Suku) citava okuti tukapa ovindekaise kuenda oviñumañuma? (5)
	Volonepa vipi vivali citava okuti tulilongisa eci catiamẽla ku Suku? (6)

1. Omanu vafendela ovina vialua. Pole Embimbiliya litusapuila okuti kuli lika Suku umosi WOCILI. Eye wapanga ovina viosi vikasi kilu kuenda Vongongo. Omo okuti watuihã omuenyo eye Lika tukuete oku fendela. — 1 Va Korindo 8:5, 6; Esituluilo 4:11.

2. Suku otukuiwa lolonduko vialua, puãi okuete onduko yimosi lika (yocili). Onduko yaco YEHOVA. Ambimbiliya valua, okuti onduko ya Suku yopiwamo kuenda yapiñanyiwa lolonduko vitukuiwa okuti ÑALA ale SUKU. Pole eci Embimbiliya liasonehĩwa, onduko Yehova ya molẽha eci cisoka 7 000 kolonjanja! — Etundilo 3:15; Osamo 83:18.

3. Yehova okuete etimba, lialitepa leli lietu. Embimbiliya lipopia okuti, “Suku espiritu”. (Yoano 4:24) Espiritu omuenyo umue wavelapo okuti wetu usule. Lomue omunu wamuile Suku. Yehova okasi kilu, pole olete cosi. (Osamo 11:4, 5; Yoano 1:18) Puãi, espiritu sandu nye? Hamunuko walisoka la Suku. Pole, ongusu yapama ya Suku. — Osamo 104:30.

4. Embimbiliya litusapuila unu wa Yehova. Lilekisa okuti ovituwa viaye viavelapo ocisola, esunga, uloño kuenda unene. (Esinumuĩlo 32:4; Yovi 12:13; Isaya 40:26; 1 Yoano 4:8) Embimbiliya litusapuilavo okuti eye ukuahenda, ukuacali, ukuakutetela, ongavi kuenda ukuepandi. Etu, omo okuti tumãla vomboka, tukuete okusetukula. — Va Efeso 5:1, 2.

Kovina vialulikiwa kuenda ke Embimbiliya oko tulilongisila eci catiamẽla ku Suku

5. Citava hẽ okuti tukekamela koviteka, kovindekaise, ale okulikutilila kokuavio vefendelo lietu? Kacitava! (Etundilo 20:4, 5) Yehova wapopia hati tukuete lika oku ufendela eye, momo ulamba waye kawavela layumue. Oviteka kavipondola oku tukuatisa. — Osamo 115:4-8; Isaya 42:8.

6. Tu kũlĩha ndati ciwa Suku? Tu (kũlĩha) ciwa Suku eci tutala ovina apanga kuenda oku sokolola ciwa elomboloko liavio. Ovilulikilo via Suku vilekisa okuti eye okuete unene walua kuenda uloño. Tulete ocisola caye kovina viosi apanga. (Osamo 19:1-6; Va Roma 1:20) Onepa yikuavo yoku lilongisa catiamẽla ku Suku oku lilongisa Embimbiliya. Embimbiliya litusapuila vali ndomo Suku atuwa. Litusapuilavo eci catiamẽla kocipango caye kuenda eci ayongola okuti tucilinga. — Amosi 3:7; 2 Timoteo 3:16, 17.

Kasandekiwa kunyamo wo 1996
Copyright © 2010 Watch Tower Bible and Tract Society of Pennsylvania. All rights reserved.