Yesu Kristu Helie?

1. Yesu eci keyile handi Vongongo wa kala omunu wespiritu kilu. Eye walulikiwa tete la Suku kuenda oco atukuiwila okuti omõla “uveli” wa Suku. (Va Kolosai 1:15; Esituluilo 3:14) Yesu eye lika Omõla Yehova Suku alulika likawaye. Eye (Yehova Suku) wa talavaya la Yesu “ndomesele” yaye oco alulike ovina vikuavo vikasi kilu kuenda Vongongo. (Olosapo 8:22-31; Va Kolosai 1:16, 17) Suku watalavayavo laye ndomunga Yaye yavelapo. Oco Yesu atukuiwila okuti “Ndaka”. — Yoano 1:1- 3; Esituluilo 19:13.

2. Suku eci a tuma Omõlaye Vongongo wasondoluila omuenyo waye vimo lia Maria. Omo liaco Yesu kakuatele isia okuti omunu ukuasitu. Mekonda lieci eye kapiñalele ekandu lekambo liokulipua. Suku watuma Yesu Vongongo mekonda liasunga vatatu ndeci: (1) Weyilila oco atulongise ocili catiamẽla ku Suku (Yoano 18:37); (2) weyilila okupandikisa, lokutuiha olumapu lukuamiwa (1 Petulu 2:21) kuenda (3) okueca omuenyo waye (ndocilumba), oco atuyovole kekandu kuenda koku fa. Momo lie eci casukiliwilile? — Mateo 20:28.

3. Omo ulume wa tete, Adama, wa lavisa ocihandeleko ca Suku, walinga eci Embimbiliya litukula okuti “ekandu”. Omo liaco Suku wopisa kolofa. (Efetikilo 3:17-19) Eye kasesamelele vali ovihandeleko via Suku, omo liaco kakalele vali lelipuo. Vokuenda kuotembo wa kuka noke wa fa. Adama wa sambuisa ekandu komãla vosi. Oco etu tukukilavo, tuvelela kuenda tufila. Catẽliwa ndati oku yovola omanu? — Va Roma 3:23; 5:12.

4. Yesu wa kala omunu walipuile, walisokele la Adama. Ndaño walisokele la Adama, valitepela apa okuti Yesu wapokuile calua ku Suku, ndaño loloseteko vialua. Omo liaco eye waeca omuenyo waye walipua omo liekandu lia Adama. Eci oco Embimbiliya litukula okuti “ocisembi”. Omãla va Adama va yovoka kekandu loku fa. Vosi okuti vakapa ekolelo liavo ku Yesu citava okuti vakateteliwa akandu vavo kuenda vaka tambula omuenyo ko pui. — 1 Timoteo 2:5, 6; Yoano 3:16; Va Roma 5:18, 19.

Vupange wa Yesu muakongela oku longisa, loku linga ovikomo kuenda okueca omuenyo waye omo lietu

5. Eci Yesu a kala Vongongo, wa sakula olombei, waeca okulia kuava vakala lonjala kuenda wa tulumula ofela yalua. Wa pindulavo ava va fa. Momo lie alingila ovikomo? (1) Wa kuata ohenda lomanu vakala oku tala ohali kuenje wavakuatisa. (2) Ovikomo viaye vialekisa okuti eye Omõla wa Suku. (3) Cosi eci calekisa eci eye akalingila komanu vapokola eci aka kala Osoma Yoluali luosi. — Mateo 14:14; Marko 2:10-12; Yoano 5:28, 29.

6. Yesu wa fa kuenda wapinduiwa la Suku letimba liespiritu, kuenda watiukila kilu. (1 Petulu 3:18) Tunde otembo oyo toke etali, Suku wokapa Kusoma. Ndopo, Yesu okamalako ohali kuenda ũvi wosi Vongongo. — Osamo 37:9-11; Olosapo 2:21, 22.

Copyright © 2008 Watch Tower Bible and Tract Society of Pennsylvania. All rights reserved.