Eliapu Helie?

1. “Eliapu” cilomboloka okuti omunu yumue opopia uhembi watiamẽla komunu ukuavo. “Satana” cilomboloka okuti unyali. Olonduko evi ovio viakapiwa kunyali wa Suku. Kefetikilo, eye wa kala ungelo walipua kilu, wa kala kumosi la Suku. Puãi, noke wayonguile oku fendeliwa nda Suku. — Mateo 4:8-10.

2. Ungelo u, Satana, wavanguila vonyoha eci ayonja Heva. Eci osapuila uhembi, wolingisa ekandu ku Suku. Satana wasenga “uviali” wa Suku, Wavelapo. Satana wa tatãlã okuviala kua Suku, okuti kakusanjuisa olonungi viusoma Waye. Satana wapopiavo okuti layumue omunu okatuihinya lesunguluko ku Suku. Omo liaco Satana walinga unyali wa Suku. Oco atukuiwila okuti Satana, Eliapu. — Efetikilo 3:1-5; Yovi 1:8-11; Esituluilo 12:9.

3.  Satana osandiliya oku kemba omanu oco vofendele. (2 Va Korindo 11:3, 14) Yimue onepa yokuyapuisa omanu etavo liesanda. Nda etavo limue lilongisa uhembi kueci catiamẽla ku Suku, ocili muele likuãi olonjongole via Satana. (Yoano 8:44) Vakuetavo liesanda pamue vatava okuti vakasi loku fendela Suku yocili. Puãi vakasi lokuvumba Satana. Eye “osuku yoluali lulo”. — 2 Va Korindo 4:4.

Etavo liesanda, umbanda kuenda olonepele violofeka viyapula omanu

4. Umbanda onepa yikuavo Satana akuama oco ayapule omanu. Omanu ava pamue vapinga oco aspiritu vavakuatise, oco vanyõle vakuavo, oco vavasapuile eci cikeya kovaso ale oco valinge ovikomo. Satana ongusu yimue yĩvi yikasi konyima yovilinga evi viosi. Oco tusanjuise Suku, kacitava okuti tutava kumbanda. — Esinumuĩlo 18:10-12; Ovilinga 19:18, 19.

5. Satana oyapulavo omanu omo liolonepele viakova kuenda oku tava kovisoko viopulitika. Vamue vasima okuti ofeka yavo ale ekova, liavelapo vali okuti vakuavo cisule. Puãi eci haciliko. (Ovilinga 10:34, 35) Vakuavo va lavoka okuti ovisoko viopulitika vika tetulula ovitangi viomanu. Omo liaco, valikala Usoma wa Suku. Owu owo lika uka tetulula ovitangi vietu. — Daniele 2:44.

Tamalãlã la Satana loku tuihinya oku lilongisa eci catiamẽla ku Yehova.

6. Onjila yikuavo yikuama Satana oco ayapuise omanu yeyi yokuti ovaseteka lolonjongole vivetiya oku linga ekandu. Yehova wapopia okuti tukuete oku yuvula olonjongole vivetiya oku linga ekandu, momo wa kũlĩha okuti vitu nyõla. (Va Galatia 6:7, 8) Vamue pamue vayongola okuti ove okuata onepa lavo kovilinga ndevi. Ivaluka okuti, Satana eye oyongola okuti ove olinga ovina evi. — 1 Va Korindo 6:9, 10; 15:33.

7. Satana pamue onolapo onjila yoku tatekiwa ale okusuvukiwa oco olitepe la Yehova. Vangandiove pamue vakutemela calua omo olilongisa Embimbiliya. Vakuavo pamue vakusanguila. Puãi omuenyo watiamẽla hẽ kulie? Satana oyongola okuku lingisa usumba oco oliwekepo oku lilongisa eci catiamẽla ku Yehova. Kukaecelele okuti oyuliwa la Satana! (Mateo 10:34-39; 1 Petulu 5:8, 9) Poku tamalãlã Keliapu, cisanjuisa Yehova kuenda cilekisa okuti oteyuila usoma Waye. — Olosapo 27:11.

Copyright © 2010 Watch Tower Bible and Tract Society of Pennsylvania. All rights reserved.