Usoma wa Suku Nye?

1. Eci Yesu a kala mulo Vongongo, walongisa olondonge viaye oku likutilila Usoma wa Suku. Usoma wulomboloka okuti uviali umue utumiliwa lombiali. Usoma wa Suku uviali umue wavelapo. Watumbikiwa ale kilu kuenda uka viala Ongongo yilo. Ukakemalisa onduko ya Suku. Uka tẽlisa ocipango ca Suku Vongongo ndeci cilingiwa kilu. — Mateo 6:9, 10.

2. Suku walikuminya okuti Yesu oka linga Osoma Yusoma Waye. (Luka 1:30-33) Eci Yesu a kala (mulo) Vongongo, wa lekisa okuti oka kala Ombiali yomboka, yikuete esunga kuenda yalipua. Eci atiukila kilu, kakapiwile handi komangu Ndosoma Yusoma wa Suku. (Va Heveru 10:12, 13) Kunyamo wo 1914, Yehova waeca ku Yesu omoko yuviali olikuminyile. Tunde otembo oyo, Yesu wa viala kilu Ndosoma yanõliwa la Yehova. — Daniele 7:13, 14.

3. Yehova wa nõlavo Vongongo alume vamue lakãi vapokola oco vaende kilu. Kumue la Yesu, vaka viala omanu ndolosoma, olonganji kuenda ovitunda. (Luka 22:28-30; Esituluilo 5:9, 10) Yesu wa tukula olombiali evi Viusoma waye okuti ‘okacunda’. Vakasi eci casoka 144 000 viomanu. — Luka 12:32; Esituluilo 14:1-3.

4. Eci Yesu a linga Osoma, watundisa Satana kilu kumue langelo vaye vãvi, kuenda wavakapa ocipepi Longongo. Mekonda lieci ovitangi vialivokiya calua mulo Vongongo tunde kunyamo wo 1914. (Esituluilo 12:9, 12) Ovoyaki, onjala, ovoveyi, kuenda evokiyo lielaviso liovihandeleko — cosi eci catiamẽla ‘kondimbukiso’ yilekisa okuti Yesu waviala ale kuenda oluali lulo lukasi koloneke viasulako. — Mateo 24:3, 7, 8, 12; Luka 21:10, 11; 2 Timoteo 3:1-5.

5. Ndopo muele, Yesu okasombisa omanu, kuenda okavatepa ndeci ungombo atepa olomeme lolohombo. “Olomeme” omanu vana valekisa okuti olonungi viaye viasunguluka. Vaka tambula omuenyo ko pui Vongongo. “Olohombo” omanu vana okuti valikala Usoma wa Suku. (Mateo 25:31-34, 46) Otembo yikeya kovaso, Yesu okakundula omanu vosi vasokisiwa ndolohombo. (2 Va Tesalonike 1:6-9) Nda oyongola okusokisiwa ‘ndolomeme’ via Yesu, okuete oku yevelela ondaka Yusoma kuenda oku kuama cosi olilongisa. — Mateo 24:14.

Eci uviali wa Yesu ukatumbikiwa, ka kuka kala vali onya kuenda olonepele

6. Cilo Ongongo yatepaiwa volofeka vialua. Ofeka lofeka yikuete ombiali yaye. Olofeka evi olonjanja vialua viliyaka pokati. Pole Usoma wa Suku uka piñala ovoviali vosi vomanu. Uka viala Ongongo yosi okuti uviali umosi lika. (Daniele 2:44) Omo liaco ka kuka kala vali ovoyaki, evĩho kuenda ungangala. Omanu vosi vaka kala pamosi vombembua kuenda elitokeko. — Mika 4:3, 4.

7. Vokuenda Kuohulukãi Yanyamo Vuviali wa Yesu, omanu vapokola vakalipua kuenda Ongongo yosi yika pongoluiwa ofeka yelau. Kesulilo liohulukãi yanyamo, Yesu okatẽlisa cosi Suku otuma oku linga. Noke okatiuwiya Usoma ku Isiaye. (1 Va Korindo 15:24) Nye kusapuililako akamba kuenda vangandiove eci Usoma wa Suku uka linga?

Copyright © 2008 Watch Tower Bible and Tract Society of Pennsylvania. All rights reserved.