Omuenyo Wepata Usanjuisa Suku

1. Embimbiliya lipopia okuti ulume eye utue, ale sungu, yepata. (1 Va Korindo 11:3) Ulume okuete oku kala lika lukãi umosi. Cisukila okuti ovo valinga olohuela ndomo cipopia ocihandeleko. — 1 Timoteo 3:2; Tito 3:1.

2. Ulume okuete okusola ukãi ndomo alisole eye muele. Okuete okutata (ukãi waye) ndeci Yesu atata olondonge viaye. (Va Efeso 5:25, 28, 29) Kacitava okuti (ulume) oveta ale otata lãvi ukãi (waye). Puãi, okuete okusumbila. — Va Kolosai 3:19; 1 Petulu 3:7.

Onjali yikuete ocisola yipongiya cosi cisukila epata cikale eci catiamẽla ketimba ale kespiritu

3. Isia okuete okutalavaya calua oco atekule epata. Okuete okueca okulia, uwalo kuenda onjo (omu akala) lukãi waye kuenda omãla. Isia okuetevo oku tata olonjongole viespiritu vepata. (1 Timoteo 5:8) Eye osongola kuenda okuatisa epata oku lilongisa eci catiamẽla ku Suku kuenda kocipango Caye. — Esinumuĩlo 6:4- 9; Va Efeso 6:4.

4. Ukãi okuete oku kala oñuatisi yiwa yulume. (Efetikilo 2:18) Eye okuete oku kuatisa ulume oku longisa kuenda oku lungula omãla. (Olosapo 1:8) Yehova oyongola okuti ukãi otata epata locisola. (Olosapo 31:10, 15, 26, 27; Tito 2:4, 5) Ukãi osukila oku kuata ocisola calua lulume waye. — Va Efeso 5:22, 23, 33.

5. Suku oyongola okuti omãla vapokola kolonjali (viavo). (Va Efeso 6:1- 3) Okevelelavo okuti olonjali vilongisa kuenda vilungula omãla. Olonjali vikuete oku kala otembo yalua lomãla kuenda oku lilongisa lavo Embimbiliya, loku tata olonjongole viavo viespiritu kuenda okuvalingila eci civasanjuisa. (Esinumuĩlo 11:18, 19; Olosapo 22:6, 15) Kacitava okuti olonjali vilongisa lonyeño yalua omãla. — Va Kolosai 3:21.

Suku okevelela okuti olonjali vilongisa omãla kuenda vava lungula

6. Eci ava valikuele vasiña ovitangi pokati kavo, vakuete oku kuama alungulo ve Embimbiliya. Embimbiliya litusapuila okuti tukuete oku lekisa ocisola kuenda okuecela. (Va Kolosai 3:12-14) Ondaka ya Suku kayilongisa okuti okulitepa oyo onjila yoku potolola ovitangi vitito. Puãi ukãi pamue onõlapo onjila yoku litepa laveyaye, nda (1) katava oku tekula epata; (2) nda watema calua, okuti okapa kohele uhayele lomuenyo wukãi waye, ale (3) nda kaecelela okuti ukãi waye ofendela Yehova. — 1 Va Korindo 7:12, 13.

7. Ava valikuele vakuete okulikolela pokati. Ukahokolo (ale uvasi) ekandu linene ku Suku kuenda kuava valikuele. (Va Heveru 13:4) Embimbiliya litava lika okulitepa kua yumue walipekela lomunu ukuavo noke yolohuela kuenje eci cecelela olohuela vikuavo. (Mateo 19:6- 9; Va Roma 7:2, 3) Yehova kasole omanu valitepaño okuti kapali esunga lie Embimbiliya kuenda valikuela lomunu ukuavo. — Malakiya 2:14-16.

Copyright © 2008 Watch Tower Bible and Tract Society of Pennsylvania. All rights reserved.