Cisukila Okuti Omanu Va Suku Valiyelisa

1. Yehova Suku okola kuenda wayela. Eye okevelela okuti afendeli vaye vayela kespiritu, vekalo, kovisimĩlo kuenda ketimba. (1 Petulu 1:16) Okutuihinya ku Suku okuti tuayela cisukila okulikolisilako kuocili. Tukasi voluali luevĩho. Tukuetevo oku yaka lovisimĩlo vietu vioku linga eci kacasungulukile. Puãi kacitava okuti tuliwekapo.

2. Okuliyelisa Kespiritu: Nda tuyongola oku vumba Yehova, kacitava okuti tukuama alongiso lovituwa vietavo liesanda. Tukuete oku tunda vetavo liesanda kuenda kacitava okuti tulinga ovina vimue viatiamelako. (2 Va Korindo 6:14-18; Esituluilo 18:4) Noke yoku lilongisa ocili catiamẽla ku Suku, tukuete okulunguka oco katukayapuiwe la vana valongisa esanda. — 2 Yoano 10, 11.

3. Okuliyelisa Vekalo: Yehova oyongola okuti otembo yosi afendeli vaye vakuama ovituwa viasunguluka oco valekise okuti akristão vocili. (1 Petulu 2:12) Eye olete cosi tulinga, ndaño cilingiwila vuyombeki. (Va Heveru 4:13) Tukuete oku yuvula ovituwa viatiamẽla koku lipekela kuenda vikuavo vĩvi vilingiwa voluali lulo. — 1 Va Korindo 6:9-11.

4. Okuliyelisa Kovisimĩlo: Nda vutue wetu tuayukisamo ovisimĩlo viasunguluka, ovituwa vietu vika sungulukavo. (Va Filipoi 4:8) Puãi nda tuatuihinya loku sokolola evi kaviasungulukile vika sulila koku linga eci cĩvi. (Mateo 15:18-20) Tukuete oku yuvula ovitalukilo vivihĩsa olondunge vietu. Vutue wetu tupondola oku yukisamo lovisimĩlo viayela eci tulilongisa Ondaka ya Suku.

5. Okuliyelisa Ketimba: Omo okuti akristão vatumiwa la Suku, vakuete oku yela ketimba lokuwalo. Tukuete oku sukula povaka eci tutunda vohondo yoku talamelako eci tupongiya ovikulia ale poku lia. Nda onjo yetu kayikuete ohondo yoku talamelako, tukuete oku fẽla okacitunu okuti eci tuakatalameleleko tulembikako. (Esinumuĩlo 23:12, 13) Okuliyelisa ketimba kunena uhayele wocili. Onjo yukristão yikuete oku yelisiwa ciwa, cikale kosamua ale vokati. Okuete okueca ongangu yiwa posongo yove.

6. Ombangulo Yasunguluka: Omanu va Suku vakuete oku vangula ocili. Olohembi kavika iñila Vusoma wa Suku. (Va Efeso 4:25; Esituluilo 21:8) Akristão kavavangula ombangulo kayasungulukile. Kavayevelela kuenda kavapopi olombangulo vĩvi ale alusapo kavasungulukile. Omo lioku popia olombangulo viwa kupange, kosikola kuenda la vakuavo valisungue lavo, valekisa okuti kavakasi (ndomanu vakualuali). — Va Efeso 4:29, 31; 5:3.

Omanu va Suku vakuete okuliyelisa kovina viosi

Copyright © 2010 Watch Tower Bible and Tract Society of Pennsylvania. All rights reserved.