Ovituwa Suku Anyale

1. Omanu va Suku vasole eci ciwa. Puãi vasukilavo oku lilongisa oku suvuka eci cĩvi. (Osamo 97:10) Eci cilomboloka oku yuvula ovituwa Suku anyale. Ovituwa viaco vipi?

2. Ukahonga: Okulipekela kuomanu okuti kavalingile handi uvala, ukahokolo, okulipekela lovinyama, oku lipekela layumue ukuepata kuenda alume valipekela lalume ale akãi valipekela lakãi cosi eci akandu vanene ku Suku. (Ovisila 18:6; Va Roma 1:26, 27; 1 Va Korindo 6:9, 10) Ava vakasi pamosi, okuti kavalingile uvala, vakuete okulitepa ale cisukila okuti valinga uvala. — Va Heveru 13:4.

Suku onyale uholua, loku nyana, locituwa cokuimba (jogatina) kuenda ungangala

3. Uhembi, Ocituwa Cokuimba (jogatina), kuenda oku Nyana: Yehova Suku kakembi. (Tito 1:2) Ava vayongola oku taviwa laye vakuete oku yuvula uhembi. (Olosapo 6:16-19; Va Kolosai 3:9, 10) Ovituwa viosi viokuimba (jogatina) viatiamẽla kocipululu. Omo liaco kacitava okuti akristão vakuata onepa kolomapalo viaco, ndeci okuimba olombongo, oku linga alupesi lolokavalu kuenda omapalo yatiamẽla koku imba otulombola tutito. (Va Efeso 5:3- 5) Akristão kavanyani. Kavalandi ovikuata va kũlĩha okuti vianyaniwa, kuenda kavakondela ovina haviavoko. — Etundilo 20:15; Va Efeso 4:28.

4. Oku kuata Onyeño Yalua, kuenda Ungangala: Oku kuata onyeño yalua cinena ungangala. (Efetikilo 4:5- 8) Omunu wosi ongangala kacitava okuti olinga ekamba lia Suku. (Osamo 11:5; Olosapo 22:24, 25) Kaciwako okufetahanya ũvi lũvi vakuetu vatulinga. — Olosapo 24:29; Va Roma 12:17-21.

5. Umbanda kuenda Okutãha: Omanu vamue vapinga ongusu yolondele ale ongusu yaspiritu vãvi oco yivasakule ovovei. Vakuavo vatuma umbanda kovanyali vavo oco vavele ale oco va fe. Satana eye sungu yovina evi. Omo liaco kacitava okuti akristão vatava kumbanda. (Esinumuĩlo 18:9-13) Okulitokeka la Yehova oyo onjila yoku teyuila umbanda utumiwa kokuetu. — Olosapo 18:10.

6. Uholua: Oku nyuapo kamue okavinyu, kuenda oservenja ale ovinyua vikuavo hekanduko. (Osamo 104:15; 1 Timoteo 5:23) Pole Yehova (Suku) kasole ava va nyua enene okuti va kolua. (1 Va Korindo 5:11-13; 1 Timoteo 3:8) Oku nyua calua kunyõla uhayele kuenda kutepa epata. Kuendavo kukoka ayonjo vakuavo. — Olosapo 23:20, 21, 29-35.

7. Omanu vosi okuti valinga ovina Suku a popia hati vĩvi ‘ka vakaiñila vusoma wa Suku’. (Va Galatia 5:19-21) Nda osole ocili Suku kuenda oyongola okusanjuisa, oka pondola okulikandangiya kovilinga viaco. (1 Yoano 5:3) Lilongisa oku suvuka cosi Suku a popia okuti cĩvi. (Va Roma 12:9) Litokeka lomanu vakuete ovituwa viwa. (Olosapo 13:20) Akamba okuti akristão, valoñoloha, vapondola oku ku kuatisa. (Tiago 5:14) Cavelapo vali kovina viosi, kolela ekuatiso lia Suku, lipingiwa vohutililo. — Va Filipoi 4:6, 7, 13.

Copyright © 2008 Watch Tower Bible and Tract Society of Pennsylvania. All rights reserved.