Atavo kuenda Ovituwa Suku Anyale

Suku ha Muvatatuko

1. Havosiko atavo lovituwa okuti vĩvi. Pole nda vitunda ketavo liesanda ale kavilitava lelongiso lie Embimbiliya Suku kavitava. — Mateo 15:6.

2. Omuvatatu: Yehova hẽ Omuvatatu — cilomboloka okuti omanu vatatu vu Suku umosi? Hacoko! Yehova, Isia, eye “Suku yocili”. (Yoano 17:3; Marko 12:29) Yesu Omõla Waye uveli kuenda wapokola ku Suku. (1 Va Korindo 11:3) Isia wavelapo okuti Omõla cisule. (Yoano 14:28) Espiritu sandu hamunuko; puãi ongusu yapama ya Suku. — Efetikilo 1:2; Ovilinga 2:18.

Onatale Lopaskoa viatunda katavo vesanda vokosimbu

Kakuli esunga lalimue lioku fendela omanu va fa ale oku vakuatela usumba

3. Onatale Lopaskoa: Yesu kacitiwile veteke lia 25 kosãi ya Cembanima. Wacitiwa kefetikilo liosãi ya Mbalavipembe, otembo okuti angombo vakala loviunda viavo (violomeme) vovisenge, luteke. (Luka 2:8-12) Yesu katumile okuti akristão valinge ocipito conjivaluko yokucitiwa kuaye. Puãi, wavatuma oku linga onjivaluko yoku fa kuaye. (Luka 22:19, 20) Onatale kuenda ovituwa viayo viatunda katavo vesanda vokosimbu. Cimuamue haeco cipita leci catiamẽla kovituwa vio Paskoa, ndeci oku kapa asala kuenda ondimba ndocindekaise cocipito caco. Akristão vatete kavalingaile onjivaluko yocipito Conatale, ale Copaskoa, ndaño akristão vocili etali kavacilingi.

4. Ovipito viokucitiwa: Ovipito vivali viokucitiwa viasonehiwa ve Embimbiliya viomanu kavavumbaile Yehova. (Efetikilo 40:20-22; Marko 6:21, 22, 24-27) Akristão vatete kavalingaile olonjivaluko viokucitiwa. Ocituwa coku linga ovipito viokucitiwa catundilila katavo vesanda vokosimbu. Akristão vocili vaeca olombanjaile kuenda vapapalela kumosi votembo yikuavo yunyamo.

5. Usumba Lomanu Va Fa: Omanu va fa kavapondola oku linga lacimue. Kacitava okuti tuvakuatisa, ndaño ovo kavapondola oku tulinga lãvi. (Osamo 146:4; Ukundi 9:5, 10) Eci omunu a fa; kakuete ocilelembia okuti cituihinya lomuenyo. (Esekiele 18:4) Puãi olonjanja vimue angelo olondingaĩvi, vatukuiwa okuti olondele, valikembisa ndakuti ovo aspiritu vomanu va fa. Ovituwa viatiamẽla koku fendela omanu va fa kuenda oku kuata lavo usumba kaviasungulukile. — Isaya 8:19.

6. Ekulusu: Yesu kafilile kekulusu. Eye wafila kuti. Ondaka yo Heveru, Vambimbiliya valua yapongoluiwa okuti “ekulusu”, yikuete elomboloko lievaya. Ondimbukiso yekulusu yatunda katavo vesanda vokosimbu. Akristão vatete kavafendalaile ekulusu. Oco hẽ, ove otava okuti casunguluka oku kapa ekulusu vefendelo lietu? — Esinumuĩlo 7:26; 1 Va Korindo 10:14.

7. Citava okuti citĩla calua okusiapo atavo kuenda ovituwa vimue. Vangandiove lakamba citava okuti vaku tateka oco kuka kuame etavo likuavo. Pole, oku sanjuisa Suku cavelapo vali okuti omanu cisule. — Olosapo 29:25; Mateo 10:36, 37.

Copyright © 2010 Watch Tower Bible and Tract Society of Pennsylvania. All rights reserved.