Ndati Ove Opondola Okusanga Etavo Liocili?

1. Yesu wasovola lika etavo limosi liocili. Omo liaco etali kuli lika ocimunga cimosi, cakristão okuti afendeli va Yehova Suku. (Yoano 4:23, 24; Va Efeso 4:4, 5) Embimbiliya lilongisa lika okuti vatito vakuãi onjila yasukatela yituala komuenyo. — Mateo 7:13, 14.

2. Embimbiliya lipopia okuti, noke yoku fa kuovapostolo, vakongelo mua molẽha alongiso vesanda kuenda ovituwa okuti ha viakristãoko. Kuamolẽha omanu vayapula vakuetavo liocili oco vavakuame ovo, okuti Kristu hayeko. (Mateo 7:15, 21-23; Ovilinga 20:29, 30) Omo liaco oco tuletele ndeti atavo valua valitepa, valitukula vati akristão. Tulimbuka ndati hẽ akristão vocili?

3. Eci cilimbukisa vali enene akristão vocili ocisola cikasi pokati kavo. (Yoano 13:34, 35) Kavalongisiwa okuti ovo vavelapo omanu vakuepata likuavo ale vakuekova likuavo vasule. Kuenda kavalongisiwavo oku suvuka omanu vokolofeka vikuavo. (Ovilinga 10:34, 35) Omo liaco, kavaendi kovoyaki. Akristão vocili valitata pokati ndavamanji. — 1 Yoano 4:20, 21.

Akristão vocili vakuete ocisola pokati kavo, vasumbila Embimbiliya kuenda vakunda Usoma wa Suku

4. Ocituwa cikuavo cikuete omanu vakuetavo liocili ceci okuti vasumbila calua Embimbiliya. Vatava okuti Ondaka ya Suku kuenda vatava eci lipopia. (Yoano 17:17; 2 Timoteo 3:16, 17) Vakapako Ondaka ya Suku okuti ovisimĩlo kuenda ovituwa viomanu visule. (Mateo 15:1-3, 7-9) Vaendisa omuenyo wavo ndomo mukasi ovihandeleko vie Embimbiliya. Omo liaco, kavakasi ndava okuti eci valongisa hacoko valinga. — Tito 1:15, 16.

5. Etavo liocili lisukilavo oku sumbila onduko ya Suku. (Mateo 6:9) Yesu wa longisa kuvakuavo okuti onduko ya Suku, eye Yehova. Akristão vocili vakuete okulinga cimuamue. (Yoano 17:6, 26; Va Roma 10:13, 14) Kimbo liove, helie, osapuilako vakuavo eci catiamẽla konduko ya Suku?

6. Akristão vocili vakuete oku kunda Usoma wa Suku. Yesu oco alingaile. Eye olonjanja viosi wavangola eci catiamẽla Kusoma. (Luka 8:1) Watuma oco olondonge viaye vikundile ondaka yimuamue Koluali luosi. (Mateo 24:14; 28:19, 20) Akristão vocili vakũlĩha okuti Usoma wa Suku owo lika uka nena ombembua yocili lokukolapo Voluali lulo. — Osamo 146:3-5.

7. Olondonge via Yesu kacitava okuti vikuata onepa voluali lulo luevĩho. (Yoano 17:16) Kavilitengi vopulitika, kuenda volonamãlala viovoluali. Vilikandangiya kovilinga kuenda kovituwa vĩvi viasiata voluali lulo. (Tiago 1:27; 4:4) Kimbo liove opondola oku limbuka ocimunga cikuete olondimbukiso evi, vilekisa akristão vocili?

Copyright © 2008 Watch Tower Bible and Tract Society of Pennsylvania. All rights reserved.