¿Ibua Bab Dummad e Reino?

1. Esus napaneg gine gudigusgua, e sordamar odurdaksa Bab Dummad sega gollalile e Reino ese egiso-ye. Wag kaya bali reino soglege negguebur sogguen gine, rey dummand gala maile. Bab Dummad e Reino, bamalad reinomar bogua akala. Nibneg gine sii geb napaneg idugoe. Bab Dummad e nuga nudakoe, soglegedi, gutumaknaidi sipu saoe. Imakoe Bab Dummad ibmar abegedi napaneg gine guedi, igi nibneg gine gumoga. (Mateo 6:9, 10.)

2. Bab Dummad sogsa, Esus, e Reino e Rey gala sigo-ye. (Lucas 1:30-33.) Esus napaneg gine gudigusgua, oyosa emar Iduged nued guo-ye, ibmar-innikiguad-saedi geb dule-suilidikidi. Nibneg sega gannar nadgua, abga Bab Dummad e Reno gine Rey gala sigis suli. (Hebreos 10:12, 13.) 1914 gine, Eoba uksa Esus gala gangued, ega iduar soglesadi. A dakale nibneg gine Esus idumai, ar Rey gala onugsales soggua. (Daniel 7:13, 14.)

3. Eoba amba eguas bali we napaneg gine machergan geb omegan eba innikuad bali gudimaladi nibneg sega nae gala. Wemar, dulemar iduged gala gumarmogoe, Esus yalabali sigmarmogoe reymar gala, dule-nabir-igar-nabiromalad gala geb Bab Dummad-igargi-emar-iduged gala. (Lucas 22:28-30; Revelación 5:9, 10.) E Reino gine ebo emar iduged gine arbamaloedi, Esus onuggusa “sibad-wawad-icheguad”. Mergumala 144,000. (mili-dulataled-ilaguen-gaka-dulabo-gaka-bake) (Lucas 12:32; Revelación 14:1-3.)

4. Esus Rey gala sigisgua, nibneg gine, ilaguen barmechar Nia imaksa geb e anger isganamala, napaneg sega. A ulale 1914 dakale napaneg gine neg ginbag isgumai. (Revelación 12:9, 12.) Bila onoged, ukumesed, bonigan, ibmar isgana mergumai…, belaguable we ibmala “oyoged” gala gue, Esus neg iduged gala sigis-ye geb neg isgunaidi berguedmos-ye. (Mateo 24:3, 7, 8, 12; Lucas 21:10, 11; 2 Timoteo 3:1-5.)

5. Iche napi Esus dulemar gala igar nabogoe, geb bachig-bachig urboe igi sibad akued bachig-bachig urbe sibad-wawad geb sibad-sichid-absar-suid gine. “Sibad-wawad” yobi dakoe, dulemar eba nue nai na oyosmaladi, geb napaneg gine sadegu gudigued ega ukoe. Dulemar Bab Dummad e Reino abin obachamalad dina “sibad-sichid-absar-suid” yobi gumala. (Mateo 25:31-34, 46.) Iche napi, yoogid sega, Esus obelogoe belaguable dulemar sibad-sichid-absar-suid yobi gumaladi. (2 Tesalonicenses 1:6-9.) Be Esus “sibad-wawad” gala gubiele, Reino e igar be itoger gebe geb ibmar durdaknaid bali be dabalir gebe. (Mateo 24:14.)

Esus neg idugoed gine, bar nikuo suli na istar dakmaladi geb na egi ichakua sunmakmaladi

6. Napaneg mamaris nai negguebur baid-baid gine geb na warguen-warguen e neg iduged nikmar bali. Neggueburmar nabo urwedbi dakdidii. Bab Dummad e Reino bela dulemar e gobiernomala obelononikoe. Bab-Dummad e Reino bii unnila napaneg idumai guoe. (Daniel 2:44.) Geb, bar nikuo suli bila onoged, emar ibloged geb sabsur ibmar imaked. Belaguable dulemar gudiguoe burakuagua neg bogid gine na warguena yobi. (Miqueas 4:3, 4.)

7. Esus miliguena Reino idugoed gine, dule nuegana suilidikid gumaloe, geb belaguable napaneg gunonikoe neg-yeer-dakleged gala. Birga miliguenad bergued mosale, Esus bela unni imaksa guoe Bab Dummad ibmar abesadi. Geb Reino ukoe e Bab gala.(1 Corintios 15:24.) ¿Ibiga be aimar gala geb be guenadgan gala be geg soge, Bab Dummad e Reino ibmar imakoedi?

Copyright © 2008 Watch Tower Bible and Tract Society of Pennsylvania. All rights reserved.