Ibmar-imakleged Bab Dummad istar daked

1. Bab Dummad gala arbamaladi ibmar nuegana binarmala, aukine amba durdakmar balir gebe ibmar isgana istar daked. (Salmo 97:10.) We soglege, Bab Dummad sogele ibmar sogguen ichagua-ye, we ibmar anmar ichakua dakmogoe ¿Bitimar sunna we ibmar isgana?

2. E abirgin sulid bogua gabed: Yoo na nikumalad iduale, ebo gabedi, abirgin nika dikar bali amiged, ibdurgan bogua galaguensur gued, na e guenadgan gine aibinedi geb omegiid gala na san saedi, bela we ibmar isgana gala gue, Bab Dummad igar gine yolegedi. (Levítico 18:6; Romanos 1:26, 27; 1 Corintios 6:9, 10.) Machered ome bogua gudi dibe ley gine na nue nikussurmala, bur na indakmaloe, sulir dina, ley gine na nikumaloe. (Hebreos 13:4.)

Bab Dummad istar dake mungued, atursaed, mani binale dodoged geb sabsur emar saed

3. Gakansaed, mani binale dodoged, atursaed: Bab Dummad Eoba wissur gakansae. (Tito 1:2.) Degi soggua dulemar Bab gala arbabiele mer gakansamogar gebe. (Proverbios 6:16-19; Colosenses 3:9, 10.) Belaguable mani binale dodogedi bur bule mani nikubie dule imake. A gala kristo-sordamar wissur dodoge, loteriagi, bingogi, moli dakedgi na mani gamalad gine geb bela ibmar wegimalad gine. (Efesios 5:3-5.) Amba atursasurmar bali geb ibmar atursalegar-ye wisile yogsaar baksurmar bali, ibmar yogsaar egichasuli sedosurmar bali. (Exodo 20:15; Efesios 4:28.)

4. Sabsur urwed, sabsur emar saed: Urwed galeged satedi sabsur emar imaked sega, sun dule see. (Génesis 4:5-8.) Sabsur emar imakmaladi Bab Dummad ai gala geg gumala. (Salmo 11:5; Proverbios 22:24, 25.) Dule warguen akar anmar imaksale, nued suli anmar abin samogadi. (Proverbios 24:29; Romanos 12:17-21.)

5. Emar gine ina isgana imaked geb burbarmaladbo sunmaked: Abar dulemala burbarmalad sega gole ega bonigan nudake gala. Bamalad dina e istarmalad gine ina isgana imakdamala, ega boni dake gala, oburguegar dibe. Bela we ibmar imaklegedi Nia gine daniki. Degi soggua kristo-sordamar we ibmar imakedi abelesuli. (Deuteronomio 18:9-13.) Ina isgana mer anmar gine nague gala, anmar Eoba gine walika guer gebe. (Proverbios 18:10.)

6. Mungued: Bipi gobedi uba e nis osorgulealedi, serbesa dibe o gobed sisa eba maidi, ichakua suli. (Salmo 104:15; 1 Timoteo 5:23.) Aukine Bab Dummad abesuli wilub obicha gobedi o munguedi. (1 Corintios 5:11-13; 1 Timoteo 3:8.) Wilub obicha gobedi sun boni gala be san gala gue, geb neg-ya beib oisgu bali. Sun bamalad ibmar isgana siki, be sed bali. (Proverbios 23:20, 21, 29-35.)

7. Bab Dummad ibmar ichagua-ye soged imakdimaladi “Bab Dummad e Reino gine dogo suli”. (Gálatas 5:19-21.) Be nue Bab Dummad sabele geb yeer-oitobibalile, ibmar wegimalad gine nabir be nosale. (1 Juan 5:3.) Be durdake, istar dake guedi ibmar ichagua-ye Bab Dummad sogedi. (Romanos 12:9.) Dulemar Bab igar wisi damalad bali be akae. (Proverbios 13:20.) Anmar sordamar undar gusa Kristo bali, nai gudimaladi nabir anmar bendakmoga. (Santiago 5:14.) Geb Bab sega goledi mer be iebaloe. (Filipenses 4:6, 7, 13.)

Copyright © 2006 Watch Tower Bible and Tract Society of Pennsylvania. All rights reserved.