Ty Fanapaha-keve’ao Hanompo An’Andranahare

1. Mba haha nama-Ndranahare anao, le toko’e hai’ao soa ty fahamarìna ami’y Baiboly ao. (1 Timoty 2:3, 4) Toko’e hinoa’ao kea raha nianara’ao reo (Hebreo 11:6), hibebake noho’ty fahota’ao iha (Asan’ny Apostoly 17:30, 31), sady mimpoly lala mba hanòva ty fiaìna’ao. (Asan’ny Apostoly 3:19) Bakeo, ty fitiava’ao an’Andranahare le toko’e hanosike anao hanome aze ty vatatena’ao. Ty dika’y zay le mila manao vavake manòka iha raike, ka hovolàni’ao ami-Ndranahare fa amea’ao aze ty vatatena’ao mba hanao ty sitrapò’e.—Matio 16:24; 22:37.

2. Laha fa baka nanome ty vata’ao ho an’Andranahare iha, le toko’e hatao batisa. (Matio 28:19, 20) Laha fa atao batisa iha le ho hita’ty olo iaby ami’zay, fa baka nanome ty vata’ao ho ahi’i Jehovah. Ka, ze fa ampy tao mba hanapa-kevitse hanompo an’Andranahare avao ro azo atao batisa. Laha fa atao batisa ty olo raike, le ty vata’e iabiaby ro toko’e haepoke tselatsela anaty rano ao.*—Marka 1:9, 10; Asan’ny Apostoly 8:36.

3. Laha fa baka nanome ty vata’ao ho ahi’i Jehovah iha, le mitamà ie fa hitanjaky ty safà natao’ao iha. (Salamo 50:14; Mpitoriteny 5:3, 4) Hanao ze hijanòna’ao tsy hanompo an’i Jehovah ty Devoly. (1 Petera 5:8) Mamonjéa an’Andranahare ami’y vavake. (Filipianina 4:6, 7) Ianàro isan’andro ty Safà’e. (Salamo 1:1-3) Ka misarake ami’ty fiangòna. (Hebreo 13:17) Laha fa manao raha iaby rezay iha, le hahazo hery tsy hivalìha ami-Ndranahare zisiky fara’e. Ho afake hanao ze raha ilà’Andranahare ami’ao mandrakizay iha ami’zay!

Tea’ao va hahazo fanazavà fanampi’e, ndra fampianàra Baiboly an-trano’ao ane? Manoràta ami’ty adiresi’y Vavolombelo’i Jehovah etoa. Adiresy

* Mba hiomana’ao ami’ty batisa, le ilà’ao ty hianatse ty bokikele hoe Fa Hita’ao va ty Lala Mandeha Ami’y Fiaìna Mandrakizay? na boky Mivavàha Ami-Ndranahare Vata’e Tò Raike Avao, ndra boky mindry ami’io, naboaki’ty Vavolombelo’i Jehovah.

Copyright © 2011 Watch Tower Bible and Tract Society of Pennsylvania. All rights reserved.