Ingosi Esemthethweni YoFakazi BakaJehova

OFakazi BakaJehova—Bangobani? Yini Abayikholelwayo?

Yini Abayikholelwayo?

OFakazi BakaJehova bakholelwa kuNkulunkulu uMninimandla onke, uJehova, uMdali wamazulu nomhlaba. Khona kanye ukuba khona kwezimangaliso eziklanywe ngokuyinkimbinkimbi endaweni yonke esizungezile kubonisa kahle ukuthi konke kwenziwa uMdali ohlakaniphe kakhulu nonamandla. Njengoba nje imisebenzi yamadoda nabesifazane iveza izimfanelo zabo, nemisebenzi kaJehova uNkulunkulu yenza okufanayo. IBhayibheli lisitshela ukuthi “izimfanelo zakhe ezingabonakali zibonakala ngokucacile kusukela ekudalweni kwezwe kuye phambili, ngoba ziqondakala ngezinto ezenziwe.” Futhi, ngaphandle kokuphimisela noma kwamazwi, “amazulu ayalanda ngenkazimulo kaJehova.”—Roma 1:20; IHubo 19:1-4.

UMHLABA . . . wadalwa uJehova . . . unakekelwa umuntu . . . kuyohlalwa kuwo phakade

Abantu abazenzi izitsha zobumba, noma benze amathelevishini nama-computer ngaphandle kwenjongo. Umhlaba nokudaliweyo kuwo okuyizitshalo nezilwane kumangalisa ngisho nakakhulu. Ukuklanywa komzimba womuntu namangqamuzana awo ayizigidigidi asinakukuqonda—ngisho nobuchopho esicabanga ngabo bumangalisa ngendlela engenakuqondakala! Uma abantu benenjongo lapho benza imiklamo yabo ewubala uma kuqhathaniswa, ngokuqinisekile uJehova uNkulunkulu wayenenjongo ngendalo yakhe emangalisayo! IzAga 16:4 zithi unayo: “UJehova wenzile konke kube nomgomo wakho.”

UJehova wenza umhlaba ngenjongo, njengoba atshela abantu bokuqala ababili: “Zalani, nande, nigcwalise umhlaba . . . nibuse phezu kwezinhlanzi zolwandle, nezinyoni zezulu, nezilwanyana ezinwabuzelayo emhlabeni.” (Genesise 1:28) Ngenxa yokuthi awuzange ulalele, lo mbhangqwana wehluleka ukugcwalisa umhlaba ngemikhaya enokulunga eyayiyowunakekela ngothando umhlaba nezitshalo zawo nezilwane. Kodwa ukwehluleka kwawo akuyibhuntshisi injongo kaJehova. Ezinkulungwaneni zeminyaka kamuva, kwalotshwa: ‘UNkulunkulu, owawubumba umhlaba akawudalelanga ize, wawubumba ukuba kuhlalwe kuwo.’ Ngeke ubhujiswe, kodwa “umhlaba umi phakade.” (Isaya 45:18; UmShumayeli 1:4) Injongo kaJehova ngomhlaba iyogcwaliseka: “Icebo lami liyakuma, ngiyakwenza yonke intando yami.”—Isaya 46:10.

Ngakho-ke, oFakazi BakaJehova bakholelwa ukuthi umhlaba uyohlala phakade nokuthi bonke abantu, abaphilayo nabafileyo, abayovumelana nenjongo kaJehova yomhlaba omuhle, owakhiwe, bangaphila kuwo phakade. Sonke isintu sazuza njengefa ukungapheleli ku-Adamu no-Eva, futhi ngenxa yalokho siyizoni. (Roma 5:12) IBhayibheli liyasitshela: “Inkokhelo isono esiyikhokhayo iwukufa.” “Abaphilayo bayazi ukuthi bayakufa, kepha abafileyo abazi lutho.” “Umphefumulo owonayo uyakufa.” (Roma 6:23; UmShumayeli 9:5; Hezekeli 18:4, 20) Khona-ke kungenzeka kanjani ukuba baphinde baphile ukuze bahlanganyele ezibusisweni zasemhlabeni? Ngomhlatshelo wesihlengo kaKristu Jesu kuphela, ngoba wathi: “Mina ngingukuvuka nokuphila. Lowo obonisa ukholo kimi, ngisho noma efa, uyophila.” ‘Bonke abasemathuneni ayisikhumbuzo bayolizwa izwi layo futhi baphume.’—Johane 5:28, 29; 11:25; Mathewu 20:28.

Lokhu kuyokwenzeka kanjani? Kuchazwe ‘ezindabeni ezinhle zombuso,’ uJesu aqala ukuzimemezela lapho esemhlabeni. (Mathewu 4:17-23) Kodwa namuhla oFakazi BakaJehova bashumayela izindaba ezinhle ngendlela ekhetheke kakhulu.

LOKHO OFAKAZI BAKAJEHOVA ABAKUKHOLELWAYO

Inkolelo	Isizathu EsingokomBhalo
IBhayibheli liyiZwi likaNkulunkulu futhi liyiqiniso	2 Thim. 3:16, 17; 2 Pet. 1:20, 21; Joh. 17:17
IBhayibheli lithembeké kakhulu kunesiko	Math. 15:3; Kol. 2:8
Igama likaNkulunkulu nguJehova	IHu. 83:18; Isaya 26:4; 42:8, AS; Eks. 6:3
UKristu uyiNdodana kaNkulunkulu futhi ungaphansi kwaKhe	Math. 3:17; Joh. 8:42; 14:28; 20:17; 1 Kor. 11:3; 15:28
UKristu wayeyizibulo lendalo kaNkulunkulu	Kol. 1:15; IsAm. 3:14
UKristu wafela esigxotsheni, hhayi esiphambanweni	Gal. 3:13; IzE. 5:30
Ukuphila kukaKristu kobuntu kwakhokhwa njengesihlengo sesintu esilalelayo	Math. 20:28; 1 Thim. 2:5, 6; 1 Pet. 2:24
Umhlatshelo owodwa kaKristu wawanele	Roma 6:10; Heb. 9:25-28
UKristu wavuswa kwabafileyo njengomuntu womoya ongafi	1 Pet. 3:18; Roma 6:9; IsAm. 1:17, 18
Ukuba khona kukaKristu kungomoya	Joh. 14:19; Math. 24:3; 2 Kor. 5:16; IHu. 110:1, 2
Manje siphila ‘esikhathini sokuphela’	Math. 24:3-14; 2 Thim. 3:1-5; Luka 17:26-30
UMbuso ngaphansi kukaKristu uyobusa umhlaba ngokulunga nangokuthula	Isaya 9:6, 7; 11:1-5; Dan. 7:13, 14; Math. 6:10
UMbuso uyoletha izimo zokuphila ezinhle emhlabeni	IHu. 72:1-4; IsAm. 7:9, 10, 13-17; 21:3, 4
Umhlaba awusoze wabhujiswa noma ungabi nabakhileyo kuwo	UmSh. 1:4; Isaya 45:18; IHu. 78:69
UNkulunkulu uyobhubhisa isimiso sezinto samanje empini ye-Armagedoni	IsAm. 16:14, 16; Zef. 3:8; Dan. 2:44; Isaya 34:2; 55:10, 11
Ababi bayobhujiswa phakade	Math. 25:41-46; 2 Thes. 1:6-9
Abantu uNkulunkulu abamukelayo bayothola ukuphila okuphakade	Joh. 3:16; 10:27, 28; 17:3; Marku 10:29, 30
Kunendlela eyodwa kuphela eya ekuphileni	Math. 7:13, 14; Efe. 4:4, 5
Ukufa kwesintu kubangelwa yisono sika-Adamu	Roma 5:12; 6:23
Umphefumulo womuntu uyapheza ukuba khona ekufeni	Hez. 18:4; UmSh. 9:10; IHu. 6:5; 146:4; Joh. 11:11-14
Isihogo siyithuna elivamile lesintu	Jobe 14:13, Dy; IsAm. 20:13, 14, AV (umbhalo oseceleni)
Ithemba labafileyo liwuvuko	1 Kor. 15:20-22; Joh. 5:28, 29; 11:25, 26
Ukufa okwabangelwa ngu-Adamu kuyophela	1 Kor. 15:26, 54; IsAm. 21:4; Isaya 25:8
Umhlambi omncane wabangu-144 000 kuphela oya ezulwini uyobusa noKristu	Luka 12:32; IsAm. 14:1, 3; 1 Kor. 15:40-53; IsAm. 5:9, 10
Abangu-144 000 bazalwa ngokusha njengamadodana kaNkulunkulu angokomoya	1 Pet. 1:23; Joh. 3:3; IsAm. 7:3, 4
Isivumelwano esisha senziwa no-Israyeli ongokomoya	Jer. 31:31; Heb. 8:10-13
Ibandla likaKristu lakhelwe kuye	Efe. 2:20; Isaya 28:16; Math. 21:42
Imithandazo kumelwe iqondiswe kuJehova kuphela ngoKristu	Joh. 14:6, 13, 14; 1 Thim. 2:5
Izithombe akufanele zisetshenziswe ekukhulekeleni	Eks. 20:4, 5; Lev. 26:1; 1 Kor. 10:14; IHu. 115:4-8
Ukusebenzelana nemimoya kumelwe kugwenywe	Dut. 18:10-12; Gal. 5:19-21; Lev. 19:31
USathane ungumbusi wezwe ongabonakali	1 Joh. 5:19; 2 Kor. 4:4; Joh. 12:31
UmKristu akumelwe ahlanganyele ezinqubweni zokuxuba izinkolo	2 Kor. 6:14-17; 11:13-15; Gal. 5:9; Dut. 7:1-5
UmKristu kumelwe azigcine ehlukile ezweni	Jak. 4:4; 1 Joh. 2:15; Joh. 15:19; 17:16
Imithetho yabantu engashayisani nemithetho kaNkulunkulu kumelwe ilalelwe	Math. 22:20, 21; 1 Pet. 2:12; 4:15
Ukufaka igazi emzimbeni ngomlomo noma ngemithambo kwephula imithetho kaNkulunkulu	Gen. 9:3, 4; Lev. 17:14; IzE. 15:28, 29
Imithetho yeBhayibheli yokuziphatha kumelwe ilalelwe	1 Kor. 6:9, 10; Heb. 13:4; 1 Thim. 3:2; IzAga 5:1-23
Ukugujwa kweSabatha kwakunikezwe ama-Israyeli kuphela futhi kwaphela noMthetho KaMose	Dut. 5:15; Eks. 31:13; Roma 10:4; Gal. 4:9, 10; Kol. 2:16, 17
Isigaba sabefundisi neziqu ezikhethekile akufanelekile	Math. 23:8-12; 20:25-27; Jobe 32:21, 22
Umuntu akazange azivelele kodwa wadalwa	Isaya 45:12; Gen. 1:27; Math. 19:4
UKristu wabeka isibonelo okumelwe silandelwe ekukhonzeni uNkulunkulu	1 Pet. 2:21; Heb. 10:7; Joh. 4:34; 6:38
Ukubhapathizwa ngokucwiliswa ngokuphelele kubonakalisa ukuzinikezela	Marku 1:9, 10; Joh. 3:23; IzE. 19:4, 5
AmaKristu alifakazela obala ngenjabulo iqiniso elingokomBhalo	Roma 10:10; Heb. 13:15; Isaya 43:10-12

Inyatheliswe ngo-2000
Copyright © 2008 Watch Tower Bible and Tract Society of Pennsylvania. All rights reserved.