Ungayithola Kanjani Inkolo Yeqiniso?

1. UJesu waqala inkolo eyodwa yobuKristu beqiniso. Ngakho namuhla kumelwe kube nendikimba eyodwa, noma iqembu, labakhulekeli beqiniso bakaJehova uNkulunkulu. (Johane 4:23, 24; Efesu 4:4, 5) IBhayibheli lifundisa ukuthi bambalwa kuphela abantu abasendleleni encane eya ekuphileni.—Mathewu 7:13, 14.

2. IBhayibheli labikezela ukuthi ngemva kokufa kwabaphostoli, izimfundiso ezingalungile nemikhuba engeyona eyobuKristu yayiyongena kancane kancane ebandleni lobuKristu. Amadoda athile ayeyomonyula amakholwa ukuze alandele wona kunokulandela uKristu. (Mathewu 7:15, 21-23; IzEnzo 20:29, 30) Kungakho sibona izinkolo eziningi kangaka ezihlukene ezithi zingezobuKristu. Singawabona kanjani amaKristu eqiniso?

3. Uphawu oluvelele kakhulu lwamaKristu eqiniso ukuthi anothando lwangempela phakathi kwawo. (Johane 13:34, 35) Awafundiswa ukuba acabange ukuthi angcono kunabantu bezinye izinhlanga noma ibala lesikhumba. Futhi awafundiswa ukuzonda abantu bakwamanye amazwe. (IzEnzo 10:34, 35) Ngakho awahlanganyeli ezimpini. AmaKristu eqiniso aphathana njengokungathi ayazalana.—1 Johane 4:20, 21.

AmaKristu eqiniso ayathandana, ayalihlonipha iBhayibheli, futhi ashumayela ngoMbuso kaNkulunkulu

4. Olunye uphawu lwenkolo yeqiniso luwukuthi amalungu ayo anenhlonipho ejulile ngeBhayibheli. Alamukela njengeZwi likaNkulunkulu futhi ayakukholelwa elikushoyo. (Johane 17:17; 2 Thimothewu 3:16, 17) Athatha iZwi likaNkulunkulu njengelibaluleke ngaphezu kwemibono yabantu noma amasiko. (Mathewu 15:1-3, 7-9) Azama ukuphila ngeBhayibheli ekuphileni kwawo kwansuku zonke. Ngakho awashumayeli okunye abe enza okunye.—Thithu 1:15, 16.

5. Inkolo yeqiniso kumelwe futhi idumise igama likaNkulunkulu. (Mathewu 6:9) UJesu wenza igama likaNkulunkulu, elithi Jehova, laziwa abanye. AmaKristu eqiniso kumelwe enze okufanayo. (Johane 17:6, 26; Roma 10:13, 14) Obani emphakathini wakini abatshela abanye ngegama likaNkulunkulu?

6. AmaKristu eqiniso kumelwe ashumayele ngoMbuso kaNkulunkulu. UJesu wakwenza. Ngaso sonke isikhathi wayekhuluma ngoMbuso. (Luka 8:1) Wayala abafundi bakhe ukuba bashumayele sona lesi sigijimi kuwo wonke umhlaba. (Mathewu 24:14; 28:19, 20) AmaKristu eqiniso akholelwa ukuthi uMbuso kaNkulunkulu kuphela oyoletha ukuthula kweqiniso nokulondeka kulomhlaba.—IHubo 146:3-5.

7. Abafundi bakaJesu kumelwe bangabi ingxenye yalelizwe elibi. (Johane 17:16) Abahileleki ezindabeni zezwe zezombangazwe nasezingxabanweni zomphakathi. Agwema ukuziphatha okulimazayo, imikhuba, nezimo zengqondo ezivamile kulelizwe. (Jakobe 1:27; 4:4) Ingabe uyalazi iqembu lenkolo elinalezi zimpawu zobuKristu beqiniso emphakathini wakini?

Copyright © 2011 Watch Tower Bible and Tract Society of Pennsylvania. All rights reserved.