1. Manje usufunde izinto eziningi ezinhle eBhayibhelini. Lolu lwazi kufanele lukuholele ekuhlakuleleni ubuntu bobuKristu. (Efesu 4:22-24) Ulwazi olunjalo lubalulekile ukuze uzuze ukuphila okuphakade. (Johane 17:3) Nokho, nabanye kudingeka bezwe izindaba ezinhle ukuze nabo basindiswe. Wonke amaKristu eqiniso kumelwe afakaze kwabanye. Kungumyalo kaNkulunkulu.—Roma 10:10; 1 Korinte 9:16; 1 Thimothewu 4:16.
2. Ungaqala ngokuhlanganyela izinto ezinhle ozifundayo nalabo osondelene nabo. Zixoxele umkhaya wakho, abangane, ofunda nabo, nalabo osebenza nabo. Yiba nomusa futhi ube nesineke lapho wenza lokho. (2 Thimothewu 2:24, 25) Khumbula ukuthi abantu ngokuvamile babheka ukuziphatha komuntu ngaphezu kokulalela lokho akushoyo. Ngakho ukuziphatha kwakho okuhle kungadonsa abanye kubenze balalele isigijimi obatshela sona.—Mathewu 5:16; 1 Petru 3:1, 2, 16.
3. Ngokuhamba kwesikhathi, ungase ufanelekele ukuqala ukushumayela nebandla lendawo yakini loFakazi BakaJehova. Lesi isinyathelo esibalulekile entuthukweni yakho. (Mathewu 24:14) Yeka indlela ongajabula ngayo uma ungase ukwazi ukusiza othile ukuba abe inceku kaJehova futhi azuze ukuphila okuphakade!—1 Thesalonika 2:19, 20. |
